ويل الحال يا محمد ..!!



ويلي و ويلي و ويل الحال يا محمد

وااااااا قلبي اللي على نيران تصلى به

في لحظةٍ كل ما قفى بها عوّد

شمّيت عطره و دهن العود ف ثيابه

حوّل يسلم و كفه بالغلا هوّد

اتقول ينثر غلاه و يختم كتابه

قلبي ( لزايد ) وقف ملهوف و اتشهّد

حتى الحنايا تداعت شوق لترابه

من قال عنا رحل أو غاب و اتبعّد ؟

و قلوبنا تنبض بشوفه و تحيا به

باقي و باقي ابوي و قصره امشيّد

من فوق ثامن سما بالنور محرابه

أقرب من الروح ..

أبعد من أحلامي و أقرب من الروح /

و ابهى من الصبح المعطر بالاعياد ..

اشوفك بكونٍ عن الخلق منزوح /

كنك لي بلادٍ بها قلبك بلاد ..

اخوان شما

يعل السحايب لي على الشوف لاحت /
تسقي ديار أمرضّفين التراحيب ..

اللي لهم روحي تعلت و راحت /
أهل المبارز وافيات المواجيب ..

اخوان شما لي من المسك فاحت /
رسلان ملقاهم على العز و الطيب ..

قانص الومض .. سمو الشيخ حمدان بن زايد آل نهيان

حمـدان لعقاله وقف قاصي الأرض

حمـدان له فـزّت أراضيه هيبه

                                                                     

علّمتهم كيف الأدب ما هو ابقـرض

و كيف التواضع تـوّج اللي مشي به

كـل الغـلا سنّة و ألكم غـلا فرض

منكـم تعـطّـر دمــي . . و فـاح طـيبـه

يا قانـص القمّـة على شارة الومض

فـي لحظـة اتصـوب فـضـاه و تـصيبـه

يا سامـي الـذوق المبجّـل و مقتبض

كفّــك . . عـلى كـل السلـوم الـنجيبــة

صفّـق لك العالم بها طـولٍ و عرض

و سجّـلك تـاريـخ الأوائـل . . حـبيبـه

« أول من اتسامت غـلا صوبه الأرض »

أول على أول . . مـن أصولٍ عريبة

يحماك ربي جامع الروح بالنبـض

يا جـامع قلوب الخـلايق بطيبه

يا اللي لنا دارٍ عن سمـومٍ و رمض

نجـم السعد لي عازم الأرض هيبة

صولجان الشموخ

مبروك عيدك يا نور و بهجة أعيادي

مبروك عيد الزمان اللي بك أعياده

يا المفرد الجمع يا نوماسي البادي

يا صولجان الشموخ و هيبة الآده

أعايد العيد بوجودك و البلادي

يا من يمينه تتوج هامة ابلاده

الجود ضيفك و إحسانك له الزادي

على عطايا كفوفك شربه و زاده

يا جامع عصورها هجري و ميلادي

يا خاتم الطيب يا كله و ميلاده

ازقر على انجومها و سهيل ينقادي

يا معزب النور يا نبعه و ميراده

حيثك مدار الزعيم و صفوة الضادي

و خطوط عرض السنام و صهوة اجياده

سبحان ربي جمعها قلوب العبادي

تنبض لك بيوف واحد انته افواده

ما ينقص الحب لك يا شيخ يزدادي

مع كل نبضٍ يلبي ( عون ) لاسياده

حبك علينا عهود و فرضٍ اوكادي

من شايبٍ كهل للمولود فمهاده 

شوفك يشافي غبينٍ بدّه اسهادي

و نظرتك تشعل حماس الحق لجهاده

تدري وش العيد يا رجواي و اسنادي ؟

 العيد عيد الكسير اللي بك أعياده



عشق ليوا

قلته و قال بماضي الوقت غصّاب

( علم الخطا يا خزام لو ما ضوى سيف )

عليك ياللي مالك ٍ حر الانساب

ياللي المعاني الكايدة لك مواليف

مالك شبيه ٍ في عجمها و الاعراب

و لا تنجب الايام ندّك و لا شيف

يا ابوي و امي و غالي الدم لي ذاب

بين البطين و بين نبض المراهيف

يا ريحة ايدودي فلاح ٍ الى ذياب

يا عشق ليوا يوم سلّم على السيْف

يا وجد حالي من تناهيت الغياب

وجد الغريب اللي تحرّا المناكيف

كل القرايب غايبة عندي اغراب

و كل الحياة ابلاك وهم و تخاريف

وينه غناتي ؟ بوظبي ناظري شاب

يقطعك يا وقت العنا و التحاسيف

آنا أحبك حب جنّات الاعناب

و اشتاق لك شوق المسا للمواليف

مرباعك اعيوني و جفني و الاهداب

و امقيضك ابيوفي علاة المشاريف

ودي اضمك بين جلدي و الاعصاب

و اسكن شعاع البدر و اقنّد الكيف

ما قلت لك ما عاضني عقبك احباب

و (علم الخطا يا خزام لوما ضوى سيف )



شيخة قلبي .. والدتي : شيخة بنت زعل آل سلطان الفلاحي

يا شيخة قلبي و عمري يا شيخة من جنان الحور

يا أول كل هالدنيا درست العمر فكتابج

يا شيخة طيب و شيخة غيد و جنة زاكية بعطور

يا خلطة مسكي و فلي أنا عطري من أطيابج

يا بنت معزب الأمجاد يا بنت الياه لي مذكور

يا هامة آل سلطان و آل الغيث و أحبابج

كأن الغيم لاقدامج يزف الجوهر المنثور

و كل الزين يفخر بج يخر و يلثم اترابج

جمعتي رحمة قلوب العباد و صار لج دستور

و حتى الطير سابقني يبا يتظلل أهدابج

كبرت و صغرت الدنيا و كونج بالغلا معمور

يا أطهر دم يحضني لأول نبض يغفى بج

أشوف النور فكفوفج يجدي حالي المكسور

و أشوف الكون يغرق بالظلام ف لحظة غيابج

يا آول و آخر الرحمة يا نورٍ باديٍ من نور

عساني ما انحرم عينج ، عساني لضرّج إحيابج

مهاجر السرب

يا رشة الوسمي و يا الصافي العذب /

يا أرض عشق و أول و منتهاها ..

تنشد عن الأحوال و اخباره القلب /

 و الغربة اللي طوّلت بي عناها ..

غربة عيون و غربة أشواقٍ و درب /

و غربة أماني حايرة في سماها ..

أبطت على الميعاد و تقول يا رب /

خفف على عبدك حمولٍ شكاها ..

أشَرّق الملقاه و يقول لي غرب /

و أذكّره بأحلامي اللي نساها ..

حظي بنار الظلم لي سايق الحرب /

خلا سنيني روّحت في صباها ..

اتقول باجر يرجع مهاجر السرب /

حمام عشق و نحتفل في لقاها ..

عل و عسى أيكون لي منّك الطب /

تسقي عروق الود يا سحب ماها ..

بك تغتني دنياي يا الوافي الذرب /

يا فجر عيدي ، مهجتي ، يا مُناها ..

ألبي القلبك و خلّك بي القلب /

يا روح روحي و الغلا يا رجاها ..

أغفى على يمناك و اصالح الحُب /

                       و أضمك بروحي و جفني غطاها   ..