يسعد صباح الكون من شوفة عيونك
و يسعد نهارٍ ضم عطرك و غنى لك
و يسعد زمان ٍ جاد بانفاسك و كونك
و يسعد سمو ٍ بك سمى دوم يبرى لك
أصبحت أنا أحبك كما كنت مجنونك
و ليمن ضواني شوقك أمسيت بك هالك
أفدا هدب عينك بعمري و لا أخونك
و أنوخ آمالي على عدك و جالك
داخل سويدا الروح تتنقل ظعونك
و ترحل هموم النفس لي شعشع هلالك
من برق نابك لين ماطاك مفتونك
أفطر حلا ذكرك و صومي على فالك
يا خلي عيوني عن الخلق يدرونك
و أصك مزلاج الحشا دون عذالك
بالله سلم لي على ضحكة جفونك
و انشد هدبها كيف دنياك و احوالك ..؟
و ثن السلام ال روحك و قل لها عونك
عونك حياتي كلها و الله افدا لك
0 comments:
إرسال تعليق