يوم الغلا ينقص و ينزل و يزداد

انته بغلاك الكون ينبض فؤاده

و يوم العرب دنياهم أقران و اضداد

وحدك ملكت الحب لاقصى بلاده

يا شوق قلبي و السما و نور الاعياد

يا بسمة الفجر الوليد افمهاده

و يا ريحة كفوف الطفل و التوداد

و يا دهن عود ٍ ما تعكر مداده

وش عاد لو راحت حياتي لك اش عاد ؟

 لرضاك تتبدل همومي سعاده

يا أول الدنيا العظيمة و الاسعاد

و يا آخر احدود الغلا و السياده

عليك يغضي جفني الليل بسهاد

كن السهر خلي و عينك سواده

ملكتني في الحب لك غصبٍ انقاد

كن الحشا شعب ٍ يبايع  قياده

و كن الحنايا ما لها غيرك اعماد

جيش ٍرخص لارواح نصر او شهاده

و كن الوله رحلك و قلبي له اشداد

من وين ما ترحل كفوفي وساده

دعيت رب الكون خلاق العباد

اللي زرع حبك و وثق عماده

يبقيك لي دنيا و لك عمري ايزاد

و تفداك روحي و الغلا يا فؤاده